سلسلة اصل المثل ( دخول الحمام مش زي خروجة )

يقال ان في راجل فتح حمام وعلشان يجذب الناس انها تيجي قعد يقول ان الدخول مجاني وقعد يعلن كتير ان الدخول من غير اي تكاليف . وطبعا علشان البشرية كلها بتحب كلمة مجاني فكان الاقبال علي الحمام دة كبير . وكان كل اللي يدخل صاحب الحمام كان بياخد منة هدومة قبل ما يدخل . وجة الوقت اللي الناس هتمشي فية ورايحين ياخدوا الهدوم . صاحب الحمام طلب من كل واحد فلوس علشان يديلة هدومة . والناس قالوا لصاحب الحمام انك قولت لينا ان الدخول مجاني  

فرد صاحب الحمام وقال ان دخول الحمام مش زي خروجة 

امتي بنستخدم المثل دة ان دخول الحمام مش زي خروجة؟

اوقات كتير في مواقف بتعدي علينا سواء كانت حلوة او وحشة وبنحس بعدها ان احنا مبقناش زي الاول 

وطبعا اختيارتنا ليها عامل اساسي كبير في دة 

هل احنا شاطرين وبنعرف نختار صح ولا اختيارتنا دايما بتكون غلط؟

كل اختيار غلط بناخدة في حياتنا بيكلفنا حاجة 

مهم جدا واحنا بنختار نحاول نكون بنختار صح كل واحد من وجه نظرة . لان انا لو اختارت من وجه نظر الناس وارد ميكونش هو دة اللي انا عايزة او هو دة المناسب والمريح بالنسبالي . ومحدش من الناس اللي حواليا هيجي يعيش مكاني او يعيش حياتي . ولو الاختيار دة طلع غلط محدش منهم هيجي يتحمل نتيجتة بدالي
اللي احنا علية دلوقت هو بسبب اختيارتنا
احنا = اختيارتنا  

ياريت نكون كلنا دايما بنفكر في اختيارتنا الاول قبل ما نكون بناخد اي قرار علشان ميكونش ( دخول الحمام  مش زي خروجة ) ويكون بيكلفنا تمن حاجة 

شاركنا برأيك . نحب نسمعك