سلسلة اصل المثل ( خذوا الحكمة من افواة المجانين )
خذوا الحكمة من افواة المجانين
تفتكروا ممكن حد يقبل نصيحة او حكمة من حد مجنون
اصل الحكاية
يقال ان كان في راجل مات وهو متغرب عن بلدة . ووصل خبر وفاتة لاولادة . ابنة الكبير حدد ميعاد للعزا . اخواتة كانوا عايزين يقسموا الميراث قبل العزا . الاخ الكبير مكنش موافق انة يعمل كدة وحاول يقنع اخواتة انهم يستنوا لبعد العزا لانه كان محرج من الناس وانهم هيقعدوا يتكلموا عليهم ويقولوا ملحقوش يستنوا يدفنوا ابوهم وقسموا الميراث . فاخواتة موافقوش علي كدة وراحوا المحكمة ورفعوا قضية علي اخوهم . جة استدعاء لاخوهم للمحكمة علشان القضية المرفوعة . الاخ الاكبر مكنش عارف يعمل اية في القضية دي . ففكر انة يروح لشخص حكيم جدا في البلد عندة ويسألة ازاي يتصرف في الموقف دة . فعلا راح للراجل الحكيم وحكالة كل اللي حصل . فرد الراجل الحكيم علية وقالة روح لفلان دة وهو هيقولك تعمل اية . الاخ الاكبر استغرب جدا لان فلان دة اللي الراجل الحكيم هيبعتة لية هو راجل مجنون . الاخ الكبير قعد يفكر في ازاي هاخد رأي واحد مجنون . وفعلا الاخ الكبير راح للشخص المجنون دة وحكالة علي كل الحكاية . فرد الراجل المجنون روح قول لاخواتك عندكم شهود ان ابونا مات اصلا علشان نقسم الميراث . فطبعا عجبتة الفكرة وراح للمحكمة وقال لاخواتة قدام القاضي هو انتوا عندكم شهود ان ابونا مات . فرد القاضي وقال لازم يكون في شهود علي الكلام اللي انتوا قولتوة ان ابوكم مات . فردوا وقالوا ان ابونا مات في بلد بعيدة والخبر وصلنا ومعندناش شهود علي دة . فرد القاضي وقال هنأجل القضية لحد ما تيجوا بالشهود . والقضية فضلت متعلقة لمدة سنة ونص في المحكمة . اخوهم قالهم مش كنتوا استنيتوا اسبوع احسن من كل اللي حصل دة
وقال الاخ الاكبر فعلا : خذوا الحكمة من افواة المجانين
يا تري في حياتنا والمواقف اللي بنمر بيها بناخد راي الناس اللي حوالينا وبستشير؟
ممكن النصيحة الصح تجيلنا من شخص غير متوقع اصلا؟
طيب هو فعلا بيوضع سرة في اضعف خلقة؟
هل دايما بنكون ماشيين بدماغنا ورافضين النصيحة وشايفين ان احنا دايما صح؟
هل مبدأ اني اخد بنصيحة حد دة بيقلل مني؟
شاركنا برأيك . نحب نسمعك
Comments
Post a Comment