سلسلة اصل المثل ( رجع بخفي حنين )

المثل دة يمكن مش كتير منا يعرفة او مش بنستخدمة كتير . المثل دة بنستخدمة لما نحس بخيبة الامل او نشوف حد فشل في الحاجة اللي هو كان عايز يعملها 

اصل حكاية المثل 

يقال ان في راجل اسمة حنين وهو كان بيصنع احذية . حنين كان شاطر جدا في صناعة الاحذية 

وفي يوم جالة راجل عربي وطلب منة ان يعملة حذاء بس للاسف حنين والعربي متفقوش علي السعر ومشي العربي من غير ما يشتري الحذاء 

فحنين اتضايق من العربي وكان عايز ينتقم منة . فكانت الخطة ان حنين يسبق العربي في الطريق ويحط فردة من الحذاء في اول الطريق والفردة التانية علي بعد كذا متر 

العربي مشي في الطريق دة ولاقي اول فردة وقال دة شبة خفي حنين وقال دي فردة واحد ياريت كانوا الفردتين مع بعض كنت اخدتهم . العربي ساب اول فردة وكمل طريقة وهو ماشي في الطريق لاقي الفردة التانية بعدها قرر انة يرجع ياخد اول فردة وساب الدابة بتاعتة علشان يروح بسرعة ياخد الفردة الاولي . طبعا حنين كان بيراقب الراجل العربي وشايف كل حاجة بتحصل. ولما حنين شاف ان العربي انة ساب الدابة بتاعتة راح بسرعة وسرقها . العربي لما رجع ملقاش الدابة ولا اللي عليها . فرجع بلدة لاهلة . لما رجع اهلة سألوه رجعت بأية فرد وقال انا رجعت بخفي حنين 

 في المثل دة العربي ضيع علي نفسة فرص كتير كان ممكن يستغلها او علي الاقل يطلع بأقل الخسائر او مثلا ولا يطلع كسبان ولا يطلع خسران 

اوقات مش بنكون فاهمين كويس احنا محتاجين اية واية ممكن نعافر علشان نوصلة واية ممكن نستغني عنة من الاول ويبقي مخسرناش حاجة 

اوقات كتير بنقعد نحاول في حاجات مش دايما بتكون الاحسن لينا والنتيجة الوحيدة اللي بنطلع بيها ان احنا خسرنا حاجات . سواء كانت الحاجات دي وقت او مجهود او مشاعر او فلوس 

الاهم ان احنا نكون بنشوف اية اللي هيناسبنا واية لا . واشوف هخسر اية وهكسب اية 

مش لازم المكسب يكون بيعود عليا انا شخصيا بس ممكن المكسب دة يعود علي شخص تاني وبرضو هكون طلعت كسبان بطريقة غير مباشرة 

شاركنا برأيك . نحب نسمعك